Z Baršća/Forst. Wěmy, až młodej fararja w Baršću stej wjelgin pilnej a kreatiwnej. Mimo tradicionelneje cerkwineje słužby, ako su w głownem namše, dupjenja a zakopowanja, wšake krejze abo pósejźenja, matej kopicu inowatiwnych idejow. Wušej politiskich diskusijnych rundow pśed wuzwólowanjami jo to južo druge lěto, źož se wótměwa lěśojska cerkwina rallye. Co to jo a kak to wótběžyjo?

Som se narskosći dla raz wobźěliła. W Baršću a wokolinje matej fararja 13 prjatkowańskich městnow. To jo wjele a jo śěžko, wšyknych wósadnych póznaś. To stej kśěłej fararja změniś. Tak stej se wumysliłej, až wót maja do septembra wugótujotej pśecej pětk w kuždej cerkwi towarišny wjacor. Wón se zachopijo z nabóžninu, aby luźe „wótšaltowali“ wót hektiki tyźenja a wiźeli, co Bog ten Kněz jo jim dobrego cynił. Pó nabóžninje se pśizamknjo mały kulturny program a casy hyšći druge pśechwatanje. Pótom su wšykne na jězu a piśe pśepšosone, ako jo kuždy sobu pśinjasł a z drugimi źělił.