Sobotu, 7. septembra, smy mógli se zabijanje kokota na Górach woglědaś, źož sedym gólcow a 12 źowćow jo se wobźěliło. Prědny kralojski pórik stej Tristan Troppa a Kielweinojc Jasmin wordowałej. Jano pór jsow dalej w Popojcach jo se wótměło łapanje kokota z pěś rejtarjami, dwěma rejtaŕkoma a 16 źowćami w swěźeńskej drastwje a z lapu. Philipp Kissel a Carolina Krausojc stej dobyłej. W Zaspach su pó 11 lětach zasej kokot łapili. Pódla jo było šesć rejtarjow a wósym źowćow. Prědny žnjowny pórik stej Tim Grundke a Amelie Buchholzojc wordowałej. Teke w Drjenowje jo šło wó głowu kokota. Mjazy šesć rejtarjami a źaseś źowćami stej se Alexander Pahn a Jenny Schuderojc kronowałej. Njeźelu, 8. septembra su w Žylowje rejtowali. Wósym rejtarjow a 26 źowćow jo se wobźěliło. Alexander Bloedorn a Jolina Schmittojc stej tam nowy pórik. W Depsku jo pěś rejtarjow wó titel krala wójowało a 12 źowćow jo pódla było. Dobyłej stej Tim Scharmacher a Amelie Müllerojc. Sobotu, 14. septembra budu wótere rejtarje ze wšakich jsow na 19. Bramborskem wejsnem a žnjownem swěźenju w Hochozy wiźeś.