Z Baršća/Forst. Pó tom, až běšo se južo w juliju konstituěrował nowy wokrejsny sejm Sprewja-Nysa (SPN), su cłonki togo parlamenta slědny tyźeń srjodu na swójom južo drugem pósejźenju we Wokrejsnem domje w Baršću dalšne nadawki społnili, ako su wjelgin wažne za źěło wokrejsnego sejma w pśiducych pěś lětach. Wuzwólili su cłonkow pśisamem źaseś wšakich wuběrkow wokrejsnego sejma a dalšnych gremijow, w kótarychž dej byś wokrejsny sejm zastupjony.

K tym wažnym wuběrkam, w kótarychž źěłaju cłonki wokrejsnego sejma a z nimi teke dalšne wobydlarje z wokrejsa SPN sobu, słuša wuběrk za serbske nastupnosći – krotko: Serbski wuběrk. Ten běchu južo w lěśe 1998 załožyli a wón jo ten jadnučki wót wšych nimsko-serbskich wokrejsow w Dolnej a Górnej Łužycy. Tak ako dotychměst pśisłuša jomu pěś pórědnych (ordentliche) cłonkow z wokrejsnego sejma, dalšnych pěś, ako jich zastupuju, a pěś wěcywuznatych (sachkundige) wobydlarjow.