Ze Schreyahna (Wendland). Lětosny „Wendentag“ jo był w kulojcowej jsy Schreyahn. Pětk a sobotu, 23. a 24. awgusta, su byli wšake popularnowědomnostne pśednoski na „Dwórje wuměłcow“. Z woglědom jo towaristwo Wendischer Freundes- und Arbeitskreis e.V. z Lüchowa było spokojom. Prof. Hardt z Lipska a dr. Schneeweis ze Šleswiga stej pśednosowałej wó archeologiskich slěźenjach we Wendlanźe. Mathias Conrad z Lüchowa jo rozkładował słowjańske pomjenjenja městow a jsow. Werner Sroka z Wórjejc jo pśedstajił žywjenje serbskich burow we Łužycy pśed sto lětami. Dr. Justyna Michniuk z Chóśebuza jo wulicowała wó słowjańskich pśiwěrkach w pódpołudnjowej Pólskej. Werner Měškank ze Zaspow jo tematizěrował muziku połobskich Słowjanow w srjejźowěku a jo gósćam pśedstajił styri nacasnje aranžěrowane pěsni w drjewjańskej rěcy. Słyńckowata sobota jo se dopołdnja zachopiła z nabóžninu, kótaruž jo nawjedowała wósadna faraŕka Sarah Baumgärtner z Wustrowa. Wurazne žycenje, aby była nabóžnina wěcejrěcna, jo namšarjam społniło Spěchowańske towaristwo za serbsku rěc w cerkwi z.t. z Chóśebuza.