Z Města/Cottbus. Wótźělenje Serbskego instituta za regionalne wuwiśe a šćit mjeńšynow slěźi mjazy drugim teke k pšašanjam mjeńšynoweje a rěcneje politiki. To pak njegroni jano wědomnostnje z tym se zaběraś, ale teke rozšyrjowaś wědu. Tak sobuźěłaśerje a sobuźěłaśeŕki pśecej zasej wšake celowe kupki informěruju. Zachopjeńk oktobera su dwě móžnosći k tomu wužywali. Na pśe-pšosenje Dolnoserbskego gymnaziuma w Měsće su póbitowali dnja 7. oktobera w serbskej wucbje někak 60 wuknicam a wuknikam 12. lětnika pśednosk k mjeńšynowej politice a mjeńšynowym pšawam w Europje, Nimskej a wósebnje Bramborskej. Dwa dnja pózdźej jo Šula za dolnoserbsku rěc a kulturu zgromadnje z wokrejsom Dubja-Błota organizěrowała dalejkubłański źeń za wokrejsnych pśistajonych w Lubinje. Mjazy temami jo teke pśinosk Serbskego instituta był k aktualnym serbskim rěcnym pšawam a rěcnej politice w Bramborskej. Referent jo był wobej raza Měto Nowak.