Z Města/Cottbus. Zachadny pětk jo jadnab 20 zajmcow do Serbskego domu pśichwatało, aby dožywiło studijny źeń Šule za dolnoserbsku rěc a kulturu. Na njom jo se wšo wjerśeło wó wuznamnych fararjow z Gołkojc, kenž su měli wjeliki wliw na serbske žywjenje, wósebnje na serbsku rěc, we swójej wósaźe. Wjednica šule, Uta Henšelowa, jo pó krotkem wuwitanju wulicowała, až su rowno na cerkwinem dnju, kenž jo se wótměł w juniju w Gołkojcach, na tu ideju pśišli, toś te zajmne pśednoski raz w drugem ramiku wóspjetowaś, aby kuždy dostał šansu něco wó žywjenju a statkowanju Jana Bjedricha Fryca, Karla Haussiga a Jana Bjedricha Tešnarja zgóniś.