Z Tšupca/Straupitz. W Tšupcu buźo zapustojska tradicija skóro widobnjejša ako źe až do togo – gasa mjazy zastanišćom „Tšupc najs“ a Cerkwinskeju drogu dostanjo mě „Fastnachtsgässchen“/„Zapustowa gaska“. Pśemjenjenje buźo w lěśe 2025 rowno we toś tom casu, gaž Tšupcański zapust swěśi swój 200-lětny jubilej wót 28. februara do 2. měrca 2025. Pšosbu za pśemjenjenje jo frakcija „Straupitz im Herzen“ zapódała, kótaraž co z teju akciju mócne znamje stajiś za kulturelne kórjenje gmejny a wusku zwězanosć k serbskej zapustowej tradiciji. Z dwójorěcnymi toflami budu stawizny Tšupca hyšći widobnjejše do gmejnskego wobraza integrěrowane.
Zapustojske towaristwo Tšupc/Błota (Fastnachtsverein Straupitz/Spreewald e.V.) pódpěrujo projekt z pósćiwańskeju akciju, kótaraž njesłužy jano pśemjenjenjeju gaski, ale teke pódpěrje źiśecego doma „Pusteblume“ w Bórkowach.
Oficielne wuswěśenje Zapustoweje gaski hyšći lětosa se wótmějo. „Wjaselimy se južo na to, našu tradiciju widobnje w gmejnje cesćiś a rownocasnje rum za zgromaźeństwo stwóriś“, groni zastupnik frakcije.