Z Rogozna/Willmersdorf. Chóśebuski měsćański źěl Rogozno ma něnto něco, což mógali se teke druge jsy ako pśikład wześ a sami pla sebje zwopšawdniś. Rozmjej: Stajili su we jsy a we wokolnej krajinje na wótpowědnych městnach tofle, na kótarychž móžomy cytaś stare tradicionelne serbske pólinowe mjenja tych stronow, teke mjenja groblow su pódla. „Glědajucy na to, až mamy lětosa 575 lět Rogozno, smy gronili, až to jo dobra góźba za taki projekt. Smy se za to starali, až te tofle su dypkownje pśed swěźenim jubileja stojali“, groni Michael Klajc (Kleitz), wótdawna zasedlony Rogozanaŕ, cłonk źěłoweje kupki „historiske wobraze Rogozno“ a iniciator togo projekta. Swój jubilej jo Rogozno swěśiło na kóńcu tyźenja 21. a 22. septembra, a južo we awgusće su stajili jadnasćo toflow.