Z Gołbina/Gulben. Něto jo jasne, chto z Dolneje Łužyce kandiděrujo za wuzwólowanje do noweje Serbskeje rady w Bramborskej. Dogromady źaseś kandidatkow a kandidatow jo se za to pśipowěźeło a wóni su teke wót swójich gremijow wobtwarźone. Sedym wót nich jo naraźiła pśedsedaŕstwo Domowinskeje župy Dolna Łužyca, tśoch towaristwo Maśica Serbska. Až do slědneje pónjeźele, 28. nowembra, stej wónej zapódałej swóje naraźenja na zagronity wólbny wuběrk, ako „sejźi“ w Dešnje na Tylcyc dwórje (wognjowa wobora).

Pśedsedaŕstwo župy Dolna Łužyca jo zastupnikow ze swójich kupkow a towaristwow slědny tyźeń srjodu, 22. oktobra, pśepšosył na wurědnu (außerordentliche) głownu zgromaźinu, a to do wejsnego domu w Gołbinje. Jano jaden dypk, jadnu wažnu wěc, su kśěli na tej zgromaźinje wobjadnaś. Cłonki, ako běchu se w slědnych tyźenjach pśipowěźeli za kandidaturu za nowu Serbsku radu, su měli how tu móžnosć se pśedstajiś. A pśibytne delegatki a delegaty su mógali jim wugroniś swóju dowěru a jich wóliś.