Dr. Manfred Seifert jo pó pśednosku w žywej diskusiji na pšašanja woglědarjow wótegronił a jo teke to jadno abo druge wó serbskej drastwje wót jeje nosaŕkow pśiwuknuł. K. P.

Z Města/Cottbus. Slědna wósebna wustajeńca Serbskego muzeja „Drastwa a moda“ jo se zachadny pětk we wósebnem ramiku skóńcyła: Serbski institut jo pśewjadł konferencu k temje „Kulturna diwersita w slěźeńskej a póraźowańskej praksy k imaterielnemu kulturnemu derbstwu“ w casu wót 24. do 26. oktobra (wěcej k tomu w pśiducem wudaśu). Gósći, rozmjej wědomnostniki a póraźowarje wšakich zwězkowych krajow za imaterielne kulturne derbstwo, su pšosone byli do muzeja, źož jo jich kuratorka Martina Nowakojc pó drastwinej wustajeńcy wjadła. Pśizamkujucy jo se „oficialna“ finisaža zachopiła, ku kótarejž jo mimo wobźělnikow konference wjele nosaŕkow drastwy pśichwatało, aby pśisłuchali pśednoskoju wó wuwiśu drastwow.