Z Budyšyna/Bautzen. Srjodu, 13. nowembra, su se zmakali cłonki prezidiuma Domowiny na swójo 38. rědowe pósejźenje w aktualnej wólbnej perioźe. Tak su wobradowali wó prědnem pśiwitanju Domowiny, kenž buźo stwórtk, 21. nowembra, w Lubinje. Wócakuju wěcej ako 80 gósći z politiki a towarišnosći, z Bramborskeje ako teke ze Sakskeje. Teke slědujuce delegěrowanja su se tematizěrowali: Lena Hauptmannojc wobźělijo se w mjenju Serbow na spiwnem wuběźowanju mjeńšynow „LIET International“ wót 21. do 23. nowembra na kupje Korsika. LIET International jo mjazynarodne wuběźowanje za modernu muziku w regionalnych a mjeńšynowych rěcach. Zaměr LIET jo, rěcnu a kulturnu wjelerakosć Europy spěchowaś a małym rěcam wěcej widobnosći pósćiś. Dalej jo prezidium na naraźenje župy Dolna Łužyca Marcusa Końcarja ako zastupnika Serbow do rozgłosoweje rady rbb na cas 2025–2029 delegěrował. Rozgłosowa rada doglědujo zastupujucy za wobydlaŕki a wobydlarjow krajowu Bramborska a Barliń programowe dopołnjenje nejwažnjejšego a nejwětšego regionalnego medijowego doma.