Fulda. Rěcewědnica Serbskego instituta, dr. Anja Pohončowa, jo rozkładowała stawnicam a stawnikam, na co maju pśi zapisowanju serbskich familijowych mjenjow źiwaś. Slězyna jo nowa kazń wó nastupajucy manźelske a rodne mě, kótaraž płaśi wót 1. maja 2025.

Sobotu, 9. nowembra 2024, jo pśednosowała dr. Anja Pohončowa z rěcywědnego wótźělenja Serbskego instituta na plenumje lětnego fachowego zejźenja Cełonimskego zwězka stawnicow a stawnikow (BDS) w Fulźe na temu „Delan – Delanow – Delanojc. Jadno familijowe mě, tśi formy – doglěd do serbskeje mjenjoweje tradicije“. Pśibytne stawniki a stawnice su byli wjelgin zajmowane na tematice, za młogich jo to był zewšym prědny kontakt ze serbskim pšašanim. Pśechwatane su byli wó wjelerakosći formow nastupajucy rodospecifiske ako teke familijowy staw pokazujuce kóńcowki serbskich familijowych mjenjow žeńskich. Pśednosowaŕka jo na kóńcu pódšmarnuła zwólniwosć z boka Serbskego instituta, pśi konkretnych napšašowanjach póraźujucy k dispoziciji stojaś a teke wótpowědujuce wobkšuśenja sformulěrowaś.