No jo, něnto znajomy w Gołbinje teke někotare. A teke gósći z Cazowa, z Gołkojc, z Rubyna, z Chóśebuza a z Bórkow, kótarež su tejerownosći pśi pśednosku w gołbinskem towaristwowem domje srjodu, 6. nowembra pódla byli, wěźe něnto wěcej wó słowjańskich bogach.

Te głowne bogi su byli Swarog, Swarožić, Perun a Weles. Dalšne bogi su na pśikład Prowe, Fredo, Žiwa a Flinc. Našu źinsajšnu cełu wědu wó bogach su napisali kśesćijańske chronisty pśed stolěśami. Tak jo Swarog był wóśc wšych bogow a stwóriśel swěta. Swarožić jo był syn Swaroga a dariśel wšogo dobrego. Weles jo był bog wódy, góle a zemje. Perun jo był bog njewjedra a wójny. Zajmna bogowka jo na kuždy pad Mokoš. Mokoš jo bogowka žeńskich, maśerjow a źiśi, lubosći a śopłosći. Wóna jo była wjelgin wažna.