Něnto kněžy se wěcej měra na kjarchobach, njejo wěcej wjele źěła. Wšak buźo wjele rowow tu njeźelu, 24. nowembra, wósebnje rědnje wugótowanych a luźe budu se tam wześ cas za spomnjeśe na swójich zgubjonych lubych. Rozmjej: Jo to slědna njeźela do prědnego adwenta a stakim njeźela zamrětych, kóńc togo cerkwinego lěta. Z prědnym adwentom pótom se zachopijo nowe cerkwine lěto.
Teke Nowy Casnik wzejo njeźelu zamrětych ako góźbu, aby slědk glědał a dopomnjeł na wažonych, zasłužonych a nam nadalej felujucych luźi – serbskego rodu abo Serbam pśichylonych a z nimi zwězanych –, kótarež smy zgubili wót nowembra 2023 až doněnta. Jich zgubjenje nas nadalej napołnijo ze žałosću. Daś se spominamy na jich statkowanje a wugbaśa, teke na jich wósobiny. A teke drugim, ako how we tom zestajenju njestoje, su naše mysli pśichylone. Daś zemja jim wšyknym lažka jo.
