Ze Žylowa/Sielow. W slěpjańskej wósaźe rad spiwaju – teke pó „slěpjańsku“. Chtož to co, ma tam w Slěpem a wokolnych serbskich jsach wjele móžnosćow. Tak w tamnem znatem folklornem ansamblu, w kupce „Rowniske głosy“, w kupce „Kólesko“ a teke pla jatšownych spiwaŕkow. Tśi žeńske wóttam to połnje wužywaju, spiwaju raz tam sobu a drugi raz zasej tam. Su to Stefanie Bierholdtec, Manuela Mohrowa a Marita Kavelmannowa. Južo cesćej su wóni wustupili ze swójim programom pśi wšakich góźbach – wósebnje pak pśi jatšownem spiwanju w Slěpem.

Docełego prědny raz su te tśi rozwjaselili publikum na kjarmušy. Domowinska kupka Chóśebuz ga jo tu kupku ze Slěpego pśepšosyła na swóju tradicionalnu kjarmušu, ako jo pla jeje cłonkow a teke pla cłonkow ze žylojskeje kupki wjelgin woblubowana. Na nju jo pśichwatało slědnu sobotu jadnab 30 luźi do gósćeńca „Nordstern“ w Žylowje, źož se toś ta Domowinska kjarmuša južo wjele lět pśewjeźo.