„Die Sorben und die Wenden, die nehms mit beiden Händen“ – ten stary pśedsudk jo zachadny pětk nowy futer krydnuł. Nowe myto „młoda ekscelenca“ jo se prědny raz pśepódało: Kužde lěto dwa luźa mjazy 18 a 30 lět dejtej 5.000 euro dostaś, gaž stej rěcny certifikat C1 derje abo wjelgin derje wobstojałej. Ten prědny mytowany źěła južo ako rěcny trenaŕ, za což dejał C1 pópšawem wuměnjenje byś, gaž južo comy rěc pó certifikatach měriś. Familijowe mě teje drugeje ekscelence jo to same ako wót wjednika institucije, kótaraž to myto wudajo. Rědnje, gaž te pjenjeze we familiji wóstanu.

Ja som teke z mjenjej ako 30 lětami serbski powědaś wuknuł, bźez Witaj-źiśownje, bźez serbskeje wucby w šuli a bźez Zorja-projekta. Som cele jadnorje lěta dłujko na rěcne kurse šeł a za to pjenjeze zapłaśił, nic njekrydnuł. Něnt zasej młodšy ako 30 wordowaś njamógu. A dokulaž to nicht njamóžo jo ga diskriminacija dla starstwa pópšawem teke zakazana.