Dnja 27. nowembra jo Šula za dolnoserbsku rěc a kulturu na mału gódownicku do Serbskego domu pśepšosyła. Slědowało jo toś tomu pśepšosenju něźi 45 luźi. Te njejsu jano z města Chóśebuza pśišli, ale teke z wokolnych serbskich jsow ako z Depska, Janšojc a Mósta, Noweje Jsy a Drjejc, Stareje Darbnje a Kalawy, Barlinja a Kótłowa.

Sobuźěłaśeŕki Rěcneje šule su mjaztym klubownju w Serbskem domje gódownje z jedłowymi gałuzami a dekoraciju wupyšnili a tykańc, placki, kołac, kafej a tej na blida scynili. Wokoło zeger tśich wótpołdnja jo se zachopił program. Wjednica rěcneje šule, Ute Henšelowa, jo swětosnje wótwóriła to wótpołdnjo ze źěkownymi słowami za lěta dłujke dobre zgromadne źěło wšych sobustatkujucych. Spiwny kwartet wokoło Geralda Šejna a žeńskich ze Slěpego jo pózwignuł k spiwanjeju a jo publikum fasciněrował z gódownymi ludowymi spiwami z Dolneje Łužyce a slěpjańskego regiona.