Juskotanje, rušowanje a wjasołosć: 24. december 2024 jo był wósebny źeń. Bamž Franciskus sejźecy we wózyku za zbrašonych jo wótcynił Swěte wrota romskego Doma swětego Pětša we Vatikanje. Z tym jo wótwórił swěte abo jubilejne lěto 2025. Mamy napšawdu pśicynu juskotaś?

Kužde pěśźasete lěto jo było w starem Israelu lěto juskotanja, w kótaremž su se wopušćili długi, su se wulichowali njewólniki, a familije su slědk dostali swóje role, kótarež musachu pśedaś nuze dla. Wótwórili su take lěto ze zukom roga barana, hebrejski jowel. Wót togo pśiźo nimske słowo Jubeljahr.

„Nuznje trjebamy nowe lěto wopušćenja długow, aby dało cłowjestwoju naźeju a planet wóstał městno, źož dajo se bydliś.“ Tak su apelěrowali religiozne wjedniki afrikańskich krajow w juliju 2024. Zadłuženje Afriki jo dojśpiło 1.200 miliardow dolarow. Taku wjelicku sumu nichten se njamóžo pśedstajiś. Afrikańske kraje maju něnto alternatiwu, něco za swójo wobydlaŕstwo cyniś, abo zekśěśe bankow dopołniś. Chto móžo napšawdu zagronitosć pśewześ, aby naźeja se wrośiła a wobnowjenje se zachopiło?