Z Njebjelčic/Nebelschütz. Ku góźbje 80. dnja zamrěśa Jana Skale (* 17. junija 1889 w Njebjelčicach, † 22. januara 1945 w dolnošlazyńskem Erbenfeld/Dziedzitz) stej spěchowańske towaristwo Smy, kótarež pódpěrujo „twórjenje prědnego demokratiski legitiměrowanego ludowego zastupnistwa Serbow – Serbski sejm“, a Domowinska kupka Njebjelčicy sobotu, 11. januara, spominałej na togo wuznamnego serbskego žurnalista, publicista a politiskego aktiwista. Pśi pomniku patriota, pśi tej za nim pomjenjonej źiśowni w Njebjelčicach, su połožyli wěnc. Tak su cesćili togo we tej jsy naroźonego Skalu, kenž jo pó słowach Tomaša Čornaka, něgajšnego šołty gmejny, „generacije Njebjelčicanarjow wobwliwował a jo se južo pśed sto lětami za samsepóstajenje Serbow a za serbski parlament zasajźił. Něnto se jogo wizije póněcom dopołniju.“ Na literariske statkowanje pócesćonego stej dopomnjełej Hańža Deleńkowa – recitěrowała basni Skale „Młodemu přećelej“ a „Dźěći“ – kaž teke Tomasz Nawka, kenž jo cytał Skali pósćone smužki „Sy mjez nami ty“ z pjera Antona Nawki.