Pasujucy k startoju nowego lěta, gaž my k tomu tenděrujomy, se do pśemyslowanja daś wó žywjenju a nas samych, wopśimjejo pśedsłowo januarskego wudaśa kulturnego casopisa Rozhlad póstarki k takemu pśemyslowanjeju. Awtorka pśedsłowa Annamaria Zahonowa nam naraźijo, až źiwamy na impuls dłymoko w našej wósobinje, až se kšuśe do dnja zaplanujomy cas jano za sebje.

Prědny pśinosk, kenž pótom w Rozhlaźe slědujo, buźo cytarjam Nowego Casnika južo znate. Jo to interview, kenž jo Justyna Michniuk wjadła z Carstenom Jacobom, jadnarjom Euroregiona Sprjewja-Nysa-Bobr z.t., a to z fokusom na jogo serbski póchad a pśichylnosć napśeśiwo tomu serbskemu. Nowy Casnik jo ten interview slědny tyźeń w nimskej rěcy wózjawił. W Rozhlaźe jen cytaśo w dolnoserbskej rěcy.