Z Błobošojc/Bloischdorf. Njeźelu jo se skóńcyła lětosna grodkojska akcija gwězdowego spiwanja, a to z namšu w katolskej cerkwi w Błobošojcach. Faraŕ Daniel Laske jo wuwitał gwězdowych spiwarjow, jich starjejšych, chor ewangelskeje cerkwje Lěšće (Hornow) a wšych, kenž su we wjelikej licbje pśichwatali. K tomu su źiśi spiwali „Wir sind die Sternensinger – wir setzen uns ein für die Kinder dieser Welt“. Moto jo se śěgnuło pśez tu cełu namšu. Hyšći raz jo se pódšmarnuł zaměr lětosneje akcije gwězdowych spiwarjow pó cełem swěśe. Słowa fararja su byli napominajuce a dorazne. Źiśi su k tomu pśedstajili małe graśe wó katechezy tśoch mudrych mužow, kótarež su pó dłujkem drogowanju naraz w Bethlehemje se zjawili, aby to góle wiźeli, kótarež jo tam w groźi w kóryśe lažało. Źiśi su se myslili, až tam su krale pśišli, pśeto te kamele su byli śěžko nakłaźone. A te tśo su gronili, až how we bliskosći jo se naroźił kral. W groźi su klěkali pśed góleśim, su se módlili a z góletkom ako z kralom wobchadali. Drogotne dary su jomu pśewóstajili, lěcrownož su wěźeli, až jogo starjejšej stej jadnorej luźa.