Iben Lottric (nalěwo) jo narucnej pupce sobu pśinjasła. Krajny raźc Harald Altekrüger (napšawo) jo pśepódał ptaškowy futer. Slězy njogo how sejźi serbska zagronita Romy Ruffowa. 
Ze Syjka/Graustein. Zymna zyma jo to, mokša a njepśijazna. Toś se pśigótuju źiśi zasej wšuźi w źiśownjach na ptaškowu swajźbu. Ptaški zastaraju we futrowych domcykach, teke doma a pla starkeje, to južo wót nowembra. Něnto jo se teke Harald Altekrüger, krajny raźc wokrejsa Sprjewja-Nysa (SPN), za zastaranje ptaškow w źiśownjach angažěrował. Zachopk k tomu jo se stał pětk, 10. januara, w źiśowni w Syjku, ako stoj pód nosaŕstwom „Albert-Schweitzer-Familienwerk Brandenburg e.V.“.
Nic mimo zawiny rowno tam: Ta Kita statkujo južo wěcej ako tśi lěta w serbskem rěcnem projekśe wokrejsa SPN sobu.
Pódla krajnego raźca stej teke Romy Ruffowa, zagronita za serbske nastupnosći wokrejsa SPN, a Iben Lottric, rěcna motiwatorka pla Domowiny, na woglěd pśišłej. Slědna jo teke swójej narucnej pupce sobu pśinjasła.
