Gronko mjaseca w měrcu zni tak: Buźo-li cuzabnik bydliś we wašom kraju, njepódtłocujśo jogo!

Gaž to pišu, jo rowno pśedsedaŕ strony, kótarejž se groni kśesćijańska, we wólbnem wójowanju pominał kuždy tyźeń jadno lětadło, aby z nim mógali cuzabnikow, kótarymž se źinsa groni migranty, wótsunuś do kraja, w kótaremž se kněžy žałosne pódtłocowanje wósebnje napśeśiwo žeńskim a wjelika njelichota. W bibliskem słowje, kótarež njejsom ja sam sebje hupytał, ale kótarež jo póstajone za toś ten mjasec, dej se powědaś wó aktualnej politiskej wěcy, kótaruž bibliske słowo direktnje narěžo.