Do wólbow, w běgu wójny a pó góńtwje se nejwěcej łdgajo! - Lěc to stare gronko, kótarež se casy pśipišo Bismarckoju, teke źinsa pśitrjefijo? Ja wšak njeby pśisegał, až dožywijomy rowno prědny raz w stawiznach, až nam medije wěrnosć pišu wó wójnje w pódzajtšu europskego kontinenta. Pišo se na pśikład, až trajo mjaztym tśi lěta. Móje spomnjeśa pak wjedu mě slědk do lěta 2014, stakim jadnasćo lět.

Serbskorěcne medije se na tuchylnej wójnskej propaganźe jano w małej měrje wobźěluju. Serbske cytarje teke lěbda raz reagěruju, lěc tomu pśigłosuju, což su cytali. Až dwa słowjańskej luda se mjazsobu bijotej, Serbow źe wěcej bóli, nježli pśisłušnikow rěcneje wětšyny. Tak som to južo zacuwał wob cas nadpadowanja na tegdejšu Jugosłowjańsku, ako su nimske medije byli we wjelikej měrje do jadnogo směra scesane.