Z Města/Cottbus. Dwě jatšownej jaji stej wótwóriłej źurja k drugemu swětoju. To jo zapśimujuce tšojenje zmakanja a zwězanja dweju kulturowu, ako se dalej wulicujo we wósebnej wustajeńcy „Christina Grecojc – Poezija pśirody“, źož se makatej serbske wuměłstwo a dot-painting awstralskich prawobydlarjow. Wustajeńca jo se pětk, 21. měrca, w Serbskem muzeju Chóśebuz z kompletnje rozpśedaneju wernisažu wótwóriła.

Znata jo Christina Grecojc (Grätz) ako pśedewześaŕka – jadnaŕka firmy Nagola Re GmbH – a biologowka. Až wóna jo teke wuměłcowka – to se zda za nju pśecej hyšći nowe a pśechwatajuce. Wótrosła jo wóna w Radojzu (Radeweise) a cesto jo pśebywała pla starkeje w Klěšniku (Wolkenberg) – wobej jsy stej se wót jamy dewastěrowałej. Wót starkeje jo Christina Grecojc južo w ranem źiśetstwje nawuknuła tradicionelnu wóskowańsku batikowu a bosěrowańsku techniku k wupyšnjenju serbskich jatšownych jajow. Teke pśez generacije dalej dane mustry su se jej tak pósrědniłej.