Z Dešna/Dissen. Njeźelu, 23. měrca, jo se wótwóriła wustajeńca „Wogeń, wóda a wupyšnjone jaja/ Feuer, Wasser und verzierte Eier“ w Domowniskem muzeju w Dešnje. Pódla informacijow k serbskim jatšownym nałogam kaž jatšowny wogeń a hyśe pó jatšownu wódu cesći se how pśedewšym derbstwo serbskego rolnikarja Helmut Kurjo (1935–2023) z Blunja (Bluno), kenž jo był profundny a wjelebocny znajaŕ drastwow, zběraŕ, braška, ludowy wuměłc a mólaŕ serbskich jatšownych jajow. Z jogo zběrkow pokažo muzej wšake z jatšami zwězane eksponaty, tak na pśikład drastwu jatšownych spiwaŕkow z wórjejskich stron a wót njogo wupyšnjone jatšowne jaja. Mjazy tymi wušej 50 gósćimi wernisaže su teke někotare pśiswójźbne, pśijaśele a znate z Blunja a wokoliny byli.