Z Wózwjercha/Wusswerk. Lěcrownož sudnistwo w Chóśebuzu jo suźiło, až Wózwjerch njesłuša k serbskemu sedleńskemu rumoju, se njedajomy wót togo wótwjasć a woplěwamy naše stare nałogi, ku kótarymž se wě camprowanje słuša. We Wózwjerchu se pśecej w póznem zymje camprujo a to jo lětosa nuznje trjebne było. Na 15. měrcu a teke južo na dnjach do togo jo zyma pokazała, až njejo hyšći dawno wugónjona. Našo towaristwo Wózwjerchojske pśijaśele jo pśepšosyło na camprowanje a wót zeger 9:30 su se togodla zmakali na tom dnju kralowka a pisany jadnorogac, jaden beauty-doc ze swójimi pacientkami, pórik ze Šotiskeje, princesna Elsa a wjele dalšnych w pisanych kostimach pśi wejsnem gaśe srjejź jsy. Młoźina jo pśinjasła pśijaśelow sobu, stare starjejše jich źiśiźiśi a chtož jo pšec śěgnuł, pśinamakajo se na kuždy pad w zapustowem casu zasej doma.