Z Budyšyna/Bautzen. Sobotu, 5. apryla, wótmějo se 23. głowna zgromaźina Domowiny – Zwězk łužyskich Serbow w zalu Serbskego ludowego ansambla w Budyšynje. Mimo změnow we wustawkach wótgłosowaś, maju delegaty ze župow a cłonkojskich towaristwow teke wuzwólowaś pśedsedarja, zastupnej pśedsedarja, cłonkow zwězkowego pśedsedaŕstwa kaž teke rewizijnego a wujadnaŕskego wuběrka za lěta wót 2025 do 2029. Za amt pśedsedarja kandiděrujo ako jadnučki Dawid Statnik, kótaryž wugbajo swój amt z lěta 2011. Jogo su wótere župy a towaristwa naraźili. Ako jogo zastupnej pśedsedarja kandiděrujotej Marlis Młynkowa, naraźona wót župy „Michał Hórnik“ Kamjeńc, a dr. Hartmut Leipner, naraźony wót župy Dolna Łužyca. Wobej stej južo w slědnej wólbnej perioźe pśedsedarja Dawida Statnika zastupowałej.