Z Města/Cottbus. Wałtoru, 8. apryla, zeger 17:00, buźo w awli Dolnoserbskego gymnaziuma nalětny koncert. Tam wustupiju wukniki solo, ale teke chor buźo něco spiwaś. Pódla w chorje jo – južo pěś lět – Julina Kochojc. Wóna jo wuknica w jadnastem lětniku a se wjaseli, až móžo pódla byś. „Ja wěm, až jo měł ten koncert juž dłujku tradiciju.“ K jeje tśeśemu koncertoju njebuźo jano w chorje, ale teke na engelski solo spiwaś. „Ja som južo w zakładnej šuli w chorje była, a to jo mě se spódobało. Ja lubujom spiwanje, dla togo som teke how.“ Teke wjednik chora, Gerald Šejn se wjaseli, až stara tradicija jo zasej žywa: „Ja mógu se dopominaś, kak wjelicnje to jo było“.

Ako pandemija jo pśišła, njejsu směli wukniki wucbu na městnje měś a teke zgromadne spiwanje jo było zakazane. Zwucowanje spiwow njejo móžno było a koncert njejo mógał se wótměś. Ta tradicija jo wusnuła.