Aktualna wósebna wustajeńca w chóśebuskem Serbskem muzeju wulicujo tšojenje jatšownych jajow a hyšći wjele wěcej ako to. Což how se wulicujo, jo wósebne tšojenje zwězanosćow. Symbolowa rěc na tradicionelnych serbskich jatšownych jajach stupijo do dialoga z awstralskimi dot-paintingami, kótarež wopśimjeju rowno tak bogatu a spóźiwabnje pódobnu symbolowu rěc – tak my nadejźomy jadnu uniwersalnu, cłowjesku rěc. Wuměłcowka, kótarejž mamy za to źěkowaś, až nam na jadnoraznu wašnju taku wušej 15.000 kilomejtarjow pśesegajucu rezonancu dožywiś zmóžnijo, jo Christina Grecojc. Jeje wustajeńca, ako jo se 21. měrca wótwóriła, ma titel: „Christina Grecojc – poezija pśirody“.

„Pśez wuměłstwo a specielnje pśez symbole móžomy se uniwerselnje rozměś. A to mam za pśeliš wjelicne“, jo groniła Christina Grecojc, Nowy Casnik pó swójej wustajeńcy wjeźeca. To jo wopšawdu fasciněrujuce, se tak pšawje do togo domysliś.