Wót 1. februara jo Uta Henšelowa wjednica Šule za dolnoserbsku rěc a kulturu. Jeje pśedchadnica Marja Elikowska-Winklerowa jo něnto wuměńkarka. „Ta Winklarka“ weto njebuźo se wót wejsanarjow a drugich, kótarež ju rad maju, wótwobrośiś. A „ta nowa“ ma wjele zajmnego a rědnego prědk. Cytajśo.

Nowy Casnik: Kak glědaš doprědka na twójo nowe źěło?

Uta Henšelowa: Som južo gjarda, až som dostała to městno ako nowa wjednica Šule za dolnoserbsku rěc a kulturu. Dokulaž mam wjele respekta pśed źěłom kněni Winkleroweje. Mě se zda, až wóna jo tak aktiwnje wabiła a źěłała a natwariła serbske narodne žywjenje na jsach w cełej Dolnej Łužycy.

Ja som dožywiła, až kněni Winklerowa jo ducy była zwenka serbskego kraja, na pśikład w Luborazu a w Dolnych Błotach. We někotarych jsach, źož te luźe njejsu za to serbske byli, ale wóna jo tam organizěrowała pśednoski, zmakanja a kurse serbskeje rěcy. A te luźe su pomałem spóznali: „aha, to su naše stawizny“. Kněni Winklerowa jo to jadnorje cyniła. To jo dobre za to serbske.