Zgromadna fotografija górnoserbskich (cerwjene) a dolnoserbskich balokoparjow (módre-cerwjene-běłe) na dešańskem sportnišću: „Serbska wubranka“ contra „Serbske koparje“. 
Dešno/Dissen. Njeźelu tyźeń na sportowem swěźenju jo se stała ceło wósebna premjera! To lětosa w aprylu w Serbskem dwórje załožone mustwo (Mannschaft) Serbske koparje jo měło swójo prědne graśe. Wóni su do Dešna kazali górnoserbskim balokoparjam. Tomu mustwoju gósći groni se na górnoserbski „Serbska wubranka“.
Serbske koparje su sebje stakim wuzwólili mócnego pśeśiwnika. Pśeto gósći z Górneje Łužyce su se južo na internacionalnych turněrach wobźělili, su stakim we balokopanju wótštapane. Wóni su se załožyli 2008, a 2012 su pśi se doma, w Górnej Łužycy, Europeadu organizěrowali – to Europske mejstarstwa mjeńšynow w balokopanju! Teke na łońskej Europeaźe w Połdnjowej Tyrolskej su grali.
