Lube źiśi,

źinsa cu dalej pisaś wó wobchaźe a pšašam: źo smějośo hyś a jěś we wobchaźe?

Źiśi zwětšego ženu pěšy. Stakim su pěškarje. Pěškarje směju jano na chódniku chójźiś. Gaž žeden chódnik njejo, směju pěškarje na droze hyś. Toś maju na pšawej abo lěwej kšomje drogi hyś, gaž su we jsy abo w měsće. Gaž něcht źo pśi droze zwenka sedlišćow, ga musy na lěwej kšomje drogi hyś.

Chtož jěźo na kólasu, jo kólasaŕ. Cesto su pśi drogach sćažki za kólasarje. Musy tam kuždy jěś ze swójim kólasom? Ně, njemusy. Chtož jo młodšy ako 8 lět, musy na chodnikach jěś. Kuždy až do 10 lět smějo na chodnikach jěś. Ze tśikólaskom abo rolerom dejśo wóstaś na chódniku. Wšykne druge kólasarje maju sćažku za kólasarje wužywaś. Gaž sćažka za kólasarje jo dokusow, něcht tam parkujo abo se twari, ga smějośo na droze jěś. Wjelgin rozglědniwje dejśo byś pśi kśisnišćach, zajězdach a wujězdach. Tam płaśi: wóstupśo z kólasa a śišććo jo!