Lětosne 38. łapanje kokota w Turjeju jo było derje woglědane. Na swěźeńskej łuce pśi nakrajnem gósćeńcu jo 12 źowćow pógónjowało šesćoch rejtarjow ze spiwami a rejami. Južor za krotki cas jo Ricardo Heinze sebje grypsnuł głowu kokota a se stakim wudobył cesć 1. krala.

Pón jo se to łapanje bejnje dliło. Wušej góźiny su dejali pśiglědowarje cakaś. Ale pón jo se něco stało, což dotychměst žednje hyšći dało njejo. – Ulli Biemelt jo z twardym pśimjenim ned wobej kśidle wótrył. Co něnto? Pó prědnem zlěknjenju a bźezradnosći su pó krotkem dogronjenju z młoźinskim šefom Thomas Eckertom wobzamknuli, jadno kśidło ekstra pśiwězaś k cesnym wrotam. Tak su mógali rejtarje weto hyšći wójowaś wó cesć 3. krala. Za krotki cas jo było jogo mě znate. Robin Richter jo pśisamem zlažkim to na šnorje wisece kśidło wótrył.

Za swóju kralowku su sebje žnjowne krale wubrali Christin Lehmannojc, Juliane Kalzcyc (Kalzke) a Annu Kosakojc (Kossack). Pśi karowanju žabow su byli te nejspěšnjejše Sophie Rademacherojc (1. městno), Vanessa Stegitzojc (2. městno) a Melanie Pjelic (Pehla, 3. městno).