Spěchowańske towaristwo za Serbski muzej Chóśebuz z.t. jo se srjodu 30. awgusta informěrowało wó stawje saněrowanja Serbskego muzeja w Chóśebuzu. Wobźělił jo se rěd cłonkow towaristwa, mjazy drugim něgajšny architekt města Chóśebuza Thomas Siebert. Wšykne smy byli wjelgin narske, lěc a kak twarske źěła doprědka du. Wjednik Měsćańskich zběrkow a Serbskego muzeja Steffen Krestin, zastupnik twarskego wótźělenja města Chóśebuz ako teke zagronity twarski inženjer su nas wutšobnje witali a wjelgin wěcywustojnje wjadli pśez ceły dom. Pśi tom su we kuždej rumnosći staw źěła rozkładowali. Smy zgónili, až mólarske źěła su we głownem wótzamknjone – kužda śpa ma wótpowědnje swójeje pózdźejšeje misije w nowej wustajeńcy hynakšu barwu, což statkujo wjelgin fryšnje a modernje. Rědna architektura doma jo tak teke zasej lěpjej wiźeś. Glědanje na zbrašnych woglědarjow w cełem domje jo pśi saněrowańskich źěłach casy wupominanje, inženjery to pak ze zagronitosću zmejstruju.