Chóśebuz/Cottbus. Na Serbske bli­do Serbskego muzeja pśedslědny pětk jo wordowała pśepšosona Jill-Francis Ketlicojc ze Žylowa, 26lětna studentka pśirownujuceje literatury a interdisciplinarnych pólskich studijow na uniwersiteśe w Halle-Wittenberg. Wóna jo nejskerjej ta tuchylu nejmłodša serbska basnikarka, ako pišo basni a tšojenja w dolnoserbskej rěcy. A rowno wokoło jeje literarnego twórjenja jo se platło rozgrono, na kótarež su pśišli mjazy drugim te nazgónjone literaty srjejźneje a staršeje generacije: Jurij Koch, Ingrid Hustetowa, Christiana Piniekowa a Madlena Norbergowa.