Pódstupim/Potsdam. Kubłarje zbóža w Bramborskej budu směś „problemowe wjelki“ źěsyś, a gaž to njepomožo, ga budu jagarje móc do nich stśělaś. To stoj we nowem wustawjenju za wobchadanje z wjelkami (Wolfsverordnung), kótarež bramborski ministaŕ za wobswět Jörg Vogelsänger jo pónjeźele tyźeń na informaciskej konferency prědk połožył.

Za wótglědanim ministarja dej to wustawjenje hyšći lětosa chopiś płaśeś. Z tym změjo kóńc diskusija, kótaruž wjedu wót maja – tencas su w Hochozy jagarje, kubłarje zbóža a wobzwarnowarje natury se z ministarjom zmakali na rozgrono. Ministaŕ se naźejo, až bramborske wustawjenje móžo byś prědkbilda za cełu Nimsku. To pak buźo móžno jano, gaž wšykne pótrjefjone budu wóny kompromis we wobjadnosći z kaznju za wobzwarnowanje natury akceptěrowaś – jo Vogelsänger gronił. Wjelk ga jo pśez kazń woplěwany, šćitany.

Co we wustawjenju stoj? K prědnemu: Wjelki, kótarež se luźam pśibližyju abo do jsy pśidu, smějoš wopytaś pśeźěsyś: do nich z kamjenjami chytaś abo z kijom je wugnaś.