Ze Slěpego/Schleife. Jatšownicu jo tudy drugi raz we nowem casu dało jatšowne spiwanje pśed cerkwju (stary nałog jatšownego spiwanja jo se tudy woplěwał až do lěta 1956, łoni su jo wótžywili). Ta iniciatiwa za to jo pśišła wót towaristwa Kólesko. Wóni su se załožyli 2011, a maju něnto 20 cłonkow, Hartmut Hantšo jo pśedsedaŕ.

Te spiwarki su musali jěsno stawaś. Zastupjone su byli wšykne geenracije: nejmłodša spiwarka jo Bertonojc Lara, akle 14 lět stara. Ta nejstarša: Marie Hentšelowa z 86 lětami. Na tom dnju su wšykne měli połžałowarsku drastwu woblaconu. Źěl tych drastwow słuša tym žeńskim, drugi źěl pśiźo ze zběrki towaristwa. Starše spiwarki woblekaju se sami, te młodše póderbje pomocy. Elvira Rathnerowa jo měła dla togo wjele wuźěła: wóna jo južo wót napoł tśich dejała šesć źowćow pó rědu wuwoblekaś. Pśeto nawłos zeger 5.30 su dejali wšykne pśi zymnem wjedrje pśed cerkwju stojaś a až do słyńca serbske kjarliže wót górjejstawanja Jezusa spiwaś. K tym woglědarjam, ako tomu tšojenju su pśiglědali, jo słušała fararka Jadwiga Malinkowa.