We Wobswětowem běrowje ewangelskeje krajneje cerkwje (EKBO) maju wót 1. apryla managery za šćit klimy (Klimaschutzmanager). To su Janes von Moers, Fabian Küstner a dr. Jörn Budde, wušej togo jadna wěcywobźěłarka, Ulrike Voß.

Wóni deje krajnocerkwiny koncept za šćit klimy do statka stajiś, ako wopśimjejo 36 napšawow. K nim słuša teke saněrowanje wósadnych twarjenjow a cerkwjow. Nadawk tych tśoch buźo, wósadam raźiś, což nastupa planowanje a zwopšadnjenje takich napšawow. Za to jo EKBO spěchowańsku sumu wót 1,2 milionow eurow k dispoziciji stajiła. Wósady a cerkwine wokrejse mógu póžedanje za financěrowanje wótpowědnych projektow stajiś. Za nas we Łužycy jo dr. Jörn Budde zagronity. Chtož ma na njogo pšašanja abo co se ako wósada pódpěrowaś daś, móžo se na njogo wobrośiś na: (030) 24 34 44 11, to jo numer wobswětowego běrowa.