Z Kórjenja/Kahren. „Co my comy a co móžomy?“ Tak dajo se wopisaś głowny tenor klawzurnego zmakanja Serbskeje wósady 21. apryla w Kórjeńskem farskem domje. K tomu dej se wósebnje pódšmarnuś, až njejsu pśišli „jano“ te serbske wósadniki, ale teke jadna jich mócnych pódpěrarkow: Promštowka Ulrike Menzelowa. Wót zachopjeńka jo była pśipódla, jo měła swóje knigly „Serbske kjarliže“ sobu a jo sobu serbski spiwała a bjatowała. A samo z konsistoriuma jo był jaden tych wobźělnikow: faraŕ dr. Clemens Bethge. Wón jo južo wěsty cas tam we wjednistwje našeje cerkwje EKBO zagronity za serbske nastupnosći. Na wjelgin wótwórjony a pódpěrujucy part jo se wugronił k pśedewześam Serbskeje wósady.