Z Chóśebuza/Cottbus. Kupka Serbska reja (styrjo cłonki Gregor Kliem, Robin Brück, Clemens Isensee a Elisabeth Fogleman) a swětoznata grajarka na tereminje Carolina Eyckec su dali njeźelu wjacor w Nimskej cerkwi na Nocy wótwórjonych cerkwjow chytšy koncert. Wóni su grali za wětšy źěł serbske tradicionelne melodije kaž „Stoj ta lipa“. Carolina Eyckec jo grała a spiwała teke solo – a jo prezentěrowała zuki swójogo eksotiskego instrumenta. Jeje graśe njejo było jano za wušy, ale teke za wócy: wóna jo cybała njewidobne tšuny a „rejowała z rukoma“. K rozkłaźenju: teremin jo instrument, na kótaremž se grajo pśez to, až gibjoš ruce a palce w elektromagentiskem pólu. Stakim njewordujo žedna tasta a žedna tšuna dotyknjona, a ruce „rejujotej“ w lufśe. K późiwanju jo było, kak derje taki moderny instrument a jogo zuki se góźe k tradiconelnej muzice. Na jaden part jo to swětowa premjera: až teremin a nykelharfa (abo klucne fidle – Gregor Kliem jo grał) stej zněłej gromaźe.