Pópšawem pśidu bajki anonymnje ze starodawnych casow k nam. Ta wó Małem Princu pak ma sławnego awtora: Ju jo francojski lětaŕ a wójnski pilot Antoine de Saint-Exupéry napisał 1942 w Americe na Long Island. A wón mějašo dar a lubosć teke byś ilustrator swójich knigłow. Pśi tom běšo pokorny luź: Bydlašo ze žeńskeju Consuelo w groźe ze 24 śpami, źěłašo pak na knigłach we małej śpicce pód kšywom.

We lěśe 1943 wudajo New Yorkske nakładnistwo Reynal & Hitchcock kniglicki we francojskem originalu – LE PETIT PRINCE – a rownocasnje engelski pód titelom THE LITTLE PRINCE. We francojskej domowni awtora wujdu knigły akle pó wójnje, 1946 w nakładnistwje Editions Gallimard, Paris. A nimske cytarje dejachu až do lěta 1950 cakaś: Düsseldorfske nakładnistwo Karl Rauch wudajo kniglicki z titelom DER KLEINE PRINZ.