Z Trjebina/Trebendorf. Zachadnu njeźelu su tudy swěśili k wósymemu razoju „muzikaliske dopołdnjo“ – narodny źeń Šusteroc dwóra (27. maj 2010 jo było pśepowdaśe kluca). Lětosa jo ten narodny źeń był kradu na njeźeli, kaž tencas.

Wjelika man woglědari jo pśišła, jich stej witałej Jolina Reichertojc a Alina Mäkelburgojc w serbskej drastwje z klěbom a solu.

Na dwórje jo był wjeliki ruš. Gósći su se dali pampany kał, swajźbarsku zupu a měso wót Starikojc flejšarnje zesłoźeś, a wušej togo klěb z pjaca a tykańc z tykańcowego bazara – naslědku drje njejo za wšykne dosegało.