Kužde druge lěto swěśe błośańske wósady swój cerkwiny źeń. A lětosa jo zasej tak daloko. Pótom, až jo był slědny raz we Wjerbnje, buźo něnto 9. septembra w Dešnje. Pód motom „Pomałčej, nižej, bližej!“ pśepšosyju na rědny źeń wót zeger 10:00 z namšu až do někak zeger 15:00. Serbske drastwy su tam wósebnje witane!

Prědny dypk buźo namša ze źiśeceju namšu zeger 10:00. To spiwanje pśiźo wót zjadnośonych chorow z Błotow pód nawjedowanim wót Budyšynojc Lydije. Prjatkowaś buźo dr. Clemens W Bethge. Wón njejo pla nas wjelgin znaty, jo ale za nas kradu wažny. W barlinskem konsistoriumje jo wón ten duchowny referent, kótaryž jo zagronity za wuwiśe serbstwa we našej krajnej cerkwi EKBO. Clemens Bethge jo Serbam napśeśiwo pśichylony a smy južo narske na jogo prjatkowanje.

Pó namšy buźo cas za wobjed. Pód motom togo dnja „Pomałčej, nižej, bližej!“ dej se to wšykno změrom staś, z casom za rozgrona, dundanje a gaž južo cośo, teke za kafejpiśe.

Pótom dej w srjejźišću stojaś ten dypk „bližej“. Pśi spiwanju nimskich a serbskich ludowych spiwow ze serbskim dušepastyrjom Ingolfom Kśenku deje wutšobkam kśidła rosć.