Rowno tak ako Domowina a serbske institucije su se měli serbske medije pó lěśe 1989, pó politiskem pśewrośe (Wende), wjelgin śěžko, se nastajiś na nowy politiski cas. To jo płaśeło rowno tak za Nowy Casnik a jogo redakciju. Su dejali wuknuś, zestajaś a wudaś njewótwisny Casnik w demokratiskem, pluralistiskem a lichotnem duchu. Se daś wjasć jano wót serbskich zajmow, byś Casnik za wšych Serbow a wopytaś, groniś tu cełu wěrnosć – ten wjeliki nadawk jo měł Casnik.

K tomu su pśišli pśidatne problemy a śěžkosći. Młoge cytarje njejsu kśěli wěcej měś ten doněntejšny socialistiski Casnik (jano w 1. połojcy 1990 jo něźi 300 abonentow Casnik wótkazało!). Pjenjeze za Casnik su se pśiskrotcyli, a tak su na kóńcu 1990 a na zachopjeńku 1991 mógali Casnik jano ze 4 bokami wudaś. Na to stej Domowina a šefredaktor „Noweje doby“ pisałej na ministarskego prezidenta de Maizera. Wótegrono jo było take: „Ich freue mich, Ihnen mitteilen zu können, dass der Ministerpräsident für Ihre Zeitschriften 1 Mio. Mark zugesagt hat und den Antrag unterstützt“. Pódpisała jo tu powěsć dr. Angela Merkelowa, tegdy zastupna powědarka kněžarstwa.