Toś to nagrono jo źaržał Marcus Końcaŕ pśi cesćenju Bjarnata Rjentša 5. oktobra pśi pśepódanju Myta Domowiny:

W Dolnej Łužycy jo wón daloko a šyroko znaty – ako kulturnik, ako ceptaŕ a ako jaden, kenž teke politiski za to serbske wustupujo. Bjarnat Rjentš njejo był jano župan, ceptaŕ na Serbskej rěcnej šuli w Dešanku, zagronity za serbske nastupnosći města Chóśebuza a załožaŕ wjelesych rejowańskich cełkow, ně, wón jo był teke organizatoriski wjednik Dolnoserbskego źiśecego chora, pózdźejšego Dolnoserbskego źiśecego ansambla, a to wušej 30 lět. Dolnoserbski źiśecy chor jo Bjarnat Rjentš natwarił ku góźbje kongresa Domowiny 1982 w Chóśebuzu. Teke pó kongresu jo organizował proby, wabił spiwarki a spiwarjow. Kóńc 80-tych lět jo chor licył 70 źiśi, kótarež su pśišli ze wšakich šulow.