Z Chóśebuza/Cottbus. Pětk pśed dwěma tyźenjoma jo Spěchowańske towaristwo za Serbski muzej pśewjadło we wjažy Měsćańskego muzeja literarno-muzikaliske wótpołdnjo k cesći Mata Kósyka. Prof. Roland Marti, sobuwudawaŕ Kósykowych spisow, jo jo moderěrował. Pětš Janaš jo basni a teksty za njo zestajał. Basni su lazowali Franz Deuse (student sorabistiki w Lipsku), Simon Blum (student rěcywědy z Pódstupima), Anna Zachariasojc, Marcus Końcaŕ, Werner Měškank, Ka­thrin Urbanscyna a Lothar Burchardt (z Drjenowa). Na cello jo grała Esther Budyšynojc. Wóna, Till Wojto a študańce z Lipska su někotare Kósykowe basni zespiwałej.

Pśisłucharje su słyšali mjazy drugim baseń Liška – serbske pśebasnjenje basni Fuchs und Gans, ako źiśi su tencas w šuli wuknuli. Kósyk jo ju napisał za swóju sotšu Majku, kótaruž jo wjelgin lubo měł. Wón jo jej pósćił teke tužnu baseń Sotśicka (wóna ga jo do casa wumrěła).