1. decembra swěśimy 1. adwent. Za luźi we wšednem žywjenju měni to slědujuce: gódy se malsnje bliže. Hyšći styri njeźele, te adwentske njeźele, a pón jo gwězdka.

W mjazycasu jo hyšći wjele stresa: gódowne dary wobstaraś, dobru jězu pśigótowaś, gódowne kórtki napisaś, z pśijaśelami na gódowne wiki hyś, na źěłe wjele doprědka źěłaś do lichego casa, bydlenje cysćiś, gódowny urlop pśigótowaś, prozninsku zaběru za źiśi organizěrowaś a tak dalej.

Tam njewóstanjo wjele casa za luźa, a to jo teke normalnje tak. Pla kśesćijanow jo wótergi hyšći wěcej stresa, dokulaž kśě namšu sobu pśigótowaś.

A južo pśiźo pśigótowanje na silwester, rozžognowanje ze starym lětom a zachopjeńk nowego lěta.

Cerkwiny kalendaŕ nam pórucyjo drugi rytmus

Pśi tom pak pórucyjo nam cerkwiny kalendaŕ ceło hynakšy rytmus. Ceło hynakšy koncept. 1. adwent ga jo w cerkwinem kalendarju zachopjeńk nowego lěta!