Z Hochoze/Drachhausen. Ryby mógu zasej wandrowaś tam a znak we Połnocnem kanalu a z kanala do Małkse a znak. To jo serbskim rybakarjam wulicował sobotu na jich głownej zgromaźinje eksperta Frank Friedrich z Woltersdorfa pla Barlinja we swójom fachowem referaśe. Wón jo rozkładował, kak funkcioněruju nowe trepy za ryby pla Smogorjowa, źož Połnocny kanal (Nordumfluter) se maka z Małksu. Małksa běžy tudy pód Połnocnym kanalom we pódzemskej renje, a teke kanal sam jo na tom měsće gaśony pśez wjelike pušćadło. Hyšći pśed dwěma lětoma njejsu ryby mógali te zadory pśewinuś. Ale kraj Bramborska jo to pušćadło łoni kradu pśetwarił, a to jo se stało we ramiku wjelikego masterplana za Sprjewju, źož jo wustajone, až ryby deje móc zasej mimo zadorow rěku górjej a dołoj wandrowaś.