Z Chóśebuza/Cottbus. Tśo wótpósłane Serbskego sejma su se zmakali w radnicy na źěłowe rozgrono z wušym šołtu Chóśebuza Holgerom Kelchom. Wóni su se wobjadnali, až jadno wót pśiducych wobradowanjow sejma buźo w měsće. Zastupniki sejma budu teke kuždy raz na lětne źěłowe rozgrono wušego šołty ze serbskimi zastupnikami sobu pśepšosone. Wušej togo su wugronili ideju, až měsćański wuběrk za nastupnosći mjeńšynow mógał se teke ze zastupnikami sejma zmakaś.
„My smy w měsće z interesu na wuzwólowanje Serbskego sejma glědali, dokulaž witamy kuždy statk, ak mócujo demokratiju na měsće. Ja to wiźim ako swóju słušnosć, wšo to pódpěraś, což interesam serbskich měsćanarjow słužy a což serbski głos k lěpšemu našeje zgromadneje łužyskeje domownje mócujo“, jo šołta pó zmakanju gronił. Pśistym jo wón wobwěsćił, až dobre zgromadne źěło z Domowinu a z drugimi towaristwami a institucijami buźo se kaž doněnta dalej wjasć.